10. april 2002 UPA 2002/16
Aalisarneq pillugu Inatsisartut inatsisaata nr. 18, 31. oktober 1996-imeersup allanngortinneqarnissaanut siunnersuummut nassuiaatit.
Nalinginnaasumik nassuiaatit
Allanngortitsinerit Kalaallit Nunaata Kitaani raajanut TAC-p agguaanneqartarnera pillugu KNAPK-p aamma APK-p isumaqatigiissutaata ulloq 11. december 2001-imeersup inatsisitigut naqissuserneqarnissaanik Naalakkersuisut kissaateqarnerannik tunngaveqarpoq.
Aalajangersakkamittaaq ikkussisoqarpoq aalisakkanik erseqqinnerusumik nalunaarsorneqarsimasunik aalisarneq pillugu nalunaarutini immikkut nalunaaruteqartarnerit pillugit maleruagassanik ilanngussisoqarsinnaanngorlugu. Taanna assersuutigalugu kapisilinniarnermut atuussinnaavoq.
Aningaasarsiornikkut suliffissaqartitsiniarnikkullu pisariaqartinneqartut qulakkeerneqarnissaat eqqarsaatigalugit peqqussutinut ilanngunneqassaaq, nunami tunitsivinnik tunisassiorfinnillu nutaanik pilersitsisoqassatillugu imaluunniit pioreersut allanik tunisassiortissinnaanngorniar-lugit allannguisoqassatillugu Naalakkersuisut akuerseqqaartassasut.
Kiisalu Aalisarneq pillugu Siunnersuisoqatigiit pillugit inatsimmi tunngavissatut aalajangersagaq allanngortinneqarpoq, maannamiit taamaallaat aalisarnermi kattuffiit aamma suliffeqarfiit aalisarnermut attuumassuteqartut ilaasortaasinnaanngortillugit.
Inatsisip aningaasatigut allaffissornikkullu kingunerisassaiInatsisip nunap karsianut aningaasartuutaanerulernissaa naatsorsuutigineqanngilaq.
TusarniaassutigineqarneraSiunnersuut ukununnga tusarniaassutigineqarpoq, KNAPK, APK, Royal Greenland A/S, Pinngortitaleriffik, KANUAANA, Kangilinnguani Sakkutooqarfik, Politimestereqarfik kiisalu Aalisarneq pillugu Siunnersuisoqatigiit. KNAPK kisiat eqqaassanngikkaannnni tusarniaa-vigineqartut sinneri tamarmik qisuariarput.
Naalakkersuisoqarfiup tamakkiisumik nalilersuereerluni nalilerpaa, tusarniaanermi akissutigineqartut inatsisissatut siunnersuutaareersup tusarniaassutigineqartup allanngor-tinnissaanut tunngavigissallugit pissutissaqanngitsoq.
Inatsisileriffiup naggataarutaasumik inatsisip oqaasertalersorneqarnera qimerlooreerpaa. Qimerluuineq kinguneqartumik allanngortinneqartariaqartut allanngortinneqarnerannik.
Inatsimmi aalajangersakkanut ataasiakkaanut nassuiaatit
§ 1 nr. 1-imut
Kalaallit Nunaata Kitaani raajanut TAC-p agguaanneqartarnera pillugu aalajangersagaq
KNAPK-p APK-llu isumaqatigiinniarnerata kinguneraa.
Siusinnerusukkut inatsisissatut siunnersuusiarineqartumut atatillugu APK-p, eqqartuussissuserisoq Kield Gustav Eriksen aqqutigalugu Naalakkersuisunut erseqqissaatigaa, raajanut TAC-ip sinerissamut qanittumi raajarnianut avataasiortunullu agguaanneqartarnerata, agguaasseriaasiusimasumiit 40/60-imiit allanngortinnera naalagaaffiup arsaarinninniarneratut isigineqartariaqartoq.
Maannamut sulilumi Naalakkersuisut isumaqarput, agguaasseriaatsimik allannguineq naalagaaffiup arsaarinninniarneratut nalilerneqarsinnaanngitsoq, taarsiissutitaqartussaan-ngitsumilli aalisarnerup iluani nalimmassaanissamik kissaateqarnermut ersiutaasoq.
Taama naliliineq eqqartuussissuserisup Wilhelm Mallingip allakkatigut akissuteqaasiaani isumagineqarpoq.
Agguaasseriaatsip inatsisinngortinnera isumaqartitsilerartarsinnaavoq, agguaasseriaatsip allanngortinnera aqqutigalugu naalagaaffik arsaarinninniartutut pissusilersortoq, arsaarinninnerli aatsaat pisinnaavoq inatsisit tunngavigalugit tamakkiisumillu taarsiissuteqarnikkut. Taamaattumik naatsorsuutigisariaqarpoq, Kalaallit Nunaata kitaani raajanut TAC-ip agguarneqartarnera, siunissami Inatsisartut allannguisarnissaannut ajornartorsiortitsisalerumaartoq.
Taamaakkaluartorli Naalakkersuisut suli isumaqarput, Kalaallit Nunaata kitaani raajanut TAC-ip agguaanneqartarnerata inatsisinngortinneqarnera ajoqutissartaqarnerunani iluaqutissar-taqarnerussasoq. Iluaqutissat ilaattut taaneqarsinnaavoq, inatsisinngortitsinikkut aalisarnermi inuussutissarsiuteqartut taarsigassarsiniarnermi periarfissat annertuumik pitsannguallattus-saammata.
Aamma aalisarnermik inuussutissarsiuteqartut Namminersornerullutillu Oqartussat raajanut TAC-imik agguaassisoqartillugu ukiuni arlaqalersuni assortuuttuarsimanerat inatsisin-ngortitsinerup kipitissavaa.
Tunumi raajanut TAC aalisariutit sinerissap qanittorsiutit avataasiutillu akornanni avinneqarnikuunngilaq.
§ 1 nr. 2-mutAalajangersagaq atorunnaarsinneqarpoq imaa § 10a-mi nutaami ilanngunneqarmat.
§ 1 nr. 3-mutAalajangersagaq ilanngunneqarpoq Naalakkersuisut Inatsisileriffiannit kaammattuuteqartoqarneratigut, taakku ilaatigut kapisilinniarneq pillugu Namminersornerullutik Oqartussat nalunaarutaannik nr. 29, 8. august 2001-imeersumik inatsisilerinermut tunngatillugu misissuereerlutik paasisimammassuk, Aalisarnermut, Piniarnermut Nunaqarfinnullu Pisortaqarfimmit pisariaqartinneqartoq, aalisakkanik aalajangersimasunik aalisarnerup unitsinneqarnissaanik sivikitsumik piffissaliilluni aalisartunut nalunaaruteqarsinnaanissaq.
Taamatut nalunaaruteqarneq pisortatigoortumik nalunaaruteqarnertut isigineqartariaqarpoq taa-
maammallu tunngaviatigut pisortatigoortumik nalunaaruteqartarneq tamanullu nalunaaruteqartarneq pillugit nalinginnaasumik piumasaqaatinik naammassinnittussaalluni.
Nalunaarutiginnittarnermik tamanullu nalunaarutiginnittarnermik maleruagassat Inatsisartut Naalakkersuisullu pillugit Inatsisartut inatsisaanni nr. 11, 20. oktober 1988-imeersumi aalajangersagaapput.
Maleruagassat atuisussanut saqqummiussisarnermut tunngatillugu maleruagassatut isigineqarta-
riaqarput, tassami ajornaqutissaqarunanngimmat saqqummiussisarnermut aamma/imaluunniit tamanut saqqummiussisarnermut periaaserineqartartut immikkut pissutsit itsillugit saneqqunneqartarnissaannut, tassa tamanna Inatsisartut inatsisaanni aalajangersarneqarsimappat imaluunniit Inatsisartut inatsisaannik tunngaveqarluni.
Taamatut aalajangersaasoqarneratigut inatsimmik tunngaveqarnissamik piumasaqaatigineqartoq
naammassineqarpoq. Qanoq saqqummiussisarnissaq pillugu erseqqinnerusumik aalajangersakkat nalunaarutini pineqartuni takuneqarsinnaasassapput.
Erseqqissarneqassaaq immikkut ittumik nalunaaruteqartarnissaq nalunaarutillu aalajangersakkami taaneqartut atortussanngortinneqartarnerat pillugu malittarisassat aatsaat atorneqartassammata nalunaarutit susassaqartunut aalajangersimasunut kinaassusersineqarsinnaasunut ikittunut sammisinneqaraangata, taamatullu aamma aalisarnerup ingerlanneqarneranut piffissanut killiligaasunut allannguutinik nalunaaruteqartoqartillugu kiisalu aalisarnerup aalajangersimasup qaqugu allartinneqarsinnaanera unitsinneqarnissaalu pillugit nalunaaruteqartoqartillugu.
Immikkut ittumik nalunaaruteqarneq atortuulersitsinerlu assersuutigalugu pisinnaavoq nunamut tamarmut paasissutissanik siammarterutinut, tamatumani minnerunngitsumik KNR Radiumut TV-mullu, kommuninut attorneqartunut KANUKOKA-mullu, aalisarnermi kattuffinnut, tunitsivinnut tunitsiviusartunut, oqarasuaatikkut il.il. saaffiginnissuteqarnikkut, taamatuttaaq Nalagaaffiup sinniisoqarfianut, politiit, kommuuninut, eqqartuussiviinnut Inatsisartunullu.
§ 1 nr. 4-mutAalajangersakkatigut siunertarineqarpoq qulakkeerneqassasoq aalisarnermik inuussutissarsiuteqarnermi, aalisakkeriveqarnermi inuussutissarsiutinilu allani taakkununnga attuumassuteqartuni aningaasaqarnermut suliffissaqartitsinermullu tunngatillugu sianiginiagassat pisariaqartinneqartut qulakkeerneqarnissaat.
Tunitsiviit tunisassiorfiillu eqqarsaatigalugit tunngaviusassaaq pilersitsiniarneq aningaasatigut illersorneqarsinnaanersoq, sumiiffimmi pilersitsiviusussamik naammattumik imermik innaallagissamillu pilersuisoqarsinnaanersoq, aalisarnermi tulaanneqartartut nioqqutigeqqinneqartarnissaat periarfissaqareernersoq kiisalu sumiiffimmi pilersitsiviusussami sulisussat naammareernersut.
Naatsumik oqaatigalugu inuussutissarsiornikkut niuernikkullu najoqqutat nalinginnaasut tassaa-sariaqarput isiginiagassat, kiisalu pisuussutit uumassusillit iluaqutigineqarniarneranni, taamatullu aamma suliffeqarfinni pisuussutit uumassusillit iluaqutiginiarneqarnerannik tunngaveqartuni, siunissaq ungasinnerusoq isigalugu piujuartitsisinnaanerup qularnaarneqarnissaa.
§ 1 nr. 5-imutPeqqussut pilersinneqarpoq Naalakkersuisut isumaqarmata tulluarpallaanngitsoq Aalisarnermut, Piniarnermut Nunaqarfinnullu Pisortaqarfiup imminut siunnersueqataasarnera. Aalisarneq pillugu Siunnersuisoqatigiit pisariaqartitsineq naapertorlugu Pisortaqarfim-meersunik taaseqataasinnaassanngitsunilli soorunami qaaqqusisinnaatitaajuassaaq.
UPA 2002/16
APNP j. nr. 64.00.01